𝗠𝗲𝗺𝗼𝗿𝗶𝗮𝗺 𝗗𝗲𝗻𝗻𝗶𝘀 𝗛𝗼𝗹𝘁𝗺𝗮𝗻

Wat ein fantasties vastelaoves seizoen hebbe weej met zien alle same belaef en 4 daag geleeje met vuël voldoening meuge aafsjloéte. Dae (optoch)wage leep geweldig en toen dit…..

Met versjlagenheid en met vuël ongeluif kreege weej zaoterdaág te huure det Dennis Holtman ein noëdlottig ôngeval is euverkômme in de Optochthal. Versjrikkelik is det en waörd sjeete te kort.

Dennis waas ‘nne vastelaovesvierder in hert en neere. Vg. D’n Oeles liërde Dennis in 2008 kenne as enthoezjas trompetis van Oeleskepel Tegels Blood. Det hae miër in ziene mars had bleef neet ônopgemerk en al sjnel woor hae auch besjteurslid van Oeleskepel Tegels Blood. Muziek make waas zien passie en det bleek waal oét zien deilname beej de Boerejoekskepèl.

D’n Oeles bleef altied in beeld en erg verheug ware weej den auch um Dennis in 2019 te verwelkomme as lid van de Raod van 11. Fanatiek ging hae metein aan de sjlaág as veurzitter van de technische kemmissie-j. Organisere, maar auch optochtwagens bouwe, zale versiere, niks waas Dennis te vuël en altiéd sjting hae klaor. Besjteurslid waas ein van zien ambities en met zien verdeenste en toemeloze inzet woor hae in 2023 sikkertaris in ’t Oelesbesjteur. Det leep op rölkes. Maar auch de technische kemmissie leet hae neet los. Beej ’t projek um de 3 optochwages ens rigoreus te gaon opknappe waas hae de kertrekker en det zôw hae naevebeej nag gaon aáfronde same met de nieje veurzitter van de technische kemmissie en eur ganse team. Iets onaáfgerond achterlaote waas neet zien dink. Dae sjieke opgeknapde wage truugk zette in de optochthal waas zien sjloetstök beej de technische kemmissie-j, dén waas Dennis vur zien geveul klaor. Helaas is dees aksie ’m op ônverklaorbare wiéze in zien ‘eige’ optochhal fataal gewaore. Hiel tragisch en neet te bevatte.

Midden in ’t laeve, same met zien Esther en eur kinger. Vol lol en plezeer. Vol energie en vreugde. Vol idee-je en planne. Hae moch sjlechs 45 jaor aad waere.
Ein groët gemis vur idderein dae Dennis kende. De berichte zien hertverwermend en euverweldigend. Ein zjwarte bladzijde in ôs historie. De ganse Oelesfemilie-j is in rouw.

Ôs gedachte gaon oét nao Esther, ziene zoon Wessel, mooder Maria, zus Nicole, Esmee, Ties, de ganse femilie-j en idderein dae Dennis leef had. Weej winse eur vuël sjterkte beej de verwerking van dit groëte verlees.

Besjteur en leeje Vg. D’n Oeles

𝗗𝗲𝗻𝗻𝗶𝘀 𝗛𝗼𝗹𝘁𝗺𝗮𝗻 | † 𝟭𝟳-𝟬𝟮-𝟮𝟬𝟮𝟰

Auk as stichting Optochhal groët Venlo zien weej erg aangedaon daor dit noëdlottig ôngeval. Boete zien verdeenste beej de Oeles waas hae jaore actief as bestuurslid van ôs stichting. Waor hae samen met ’t technisch team groete inhaolslage haet gemak beej ’t onderhand van de hal.

Weej zien Dennis erg erkintelik en zulle um erg gaon misse.

Ôs gedachte gaon oet naor de femilie, vrinde en bekinde van Dennis en winse eur hiel vuuel sterkte met dit verlees.

Bestuur en deilnemers Stichting optochhal groët Venlo